“Sky resort”-д зорчсон өдрийн тэмдэглэл.

Хэд хоногийн өмнөөс төлөвлөн байж Драмын Эрдмийн Театрын өмнөөс цагаан өнгийн Соната-2 машинд 5 найз цуглан хөдлөв. Оройн ээлжнийх нь 18.00-22.00 цаг тул яарч байлаа. Монголчууд болсон хойно цувж уван 18.30-д цуглан нэг нэгэндээ гомдоллосноор жижиг амралт эхлэв.

Азид гуравт ордог гэх баталгаагүй мэдээллээр сэтгэлээ зогоон явлаа. Сингапурт сурдаг хэдэн Шотланд энд гулгах ирснийг бодоход үнэн байж магадгүй ээ.

Их тэнгэрийн амнаас өнгөрөөд нуль дэржигнүүр замаар хуучин Солонгос машин 4 дугуйгаа 4 тийш нь салгах шахам явлаа. Дайн дээр дажин гэгчээр явж үзээгүй жолоочид болхи хийцтэй хурд сааруулагч эмзэг асуудал болж байлаа.

Жижиг даваа даваад оронгуут олон машин багтахуйц шороон зогсоол угтав. Хамгаалалт тийм ч сайн биш харагдаж байлаа.

Тасалбараас эхлээд хувцас авах энэ тэр асуудлыг шийдвэрлэхэд нилээд хугацаа зарцууллаа. Энд хөдөлбөл хөлс зогсвол зоос ажээ. Бүр хувцас хадгалах шүүгээ хүртэл шүү.

Урьд нь нэг удаа очиж, багш хөлслөн заалгаж байсан тул агуу их зоригийг шулуудан 3-р зэрэглэлийн замаар гулгахаар боллоо.

Хамгийн анх Ну-Погодигоор харж байсан искалатороор дээш өгсөв. Суух үед эмэгтэй хүн бүр ээжийгээ дууддаг, бөгөөд буухад нэг охин толгойгоо цохисныг эс тооцвол их дажгүй.

Бас их хүйтэн. Би нүүрээ хүйтэн салхинд түлсэн. Эдгээрээс хувцастайгаа хамт хамгаалалтын каск, түлэгдэлтээс хамгаалах тос хоёр багтаах хэрэгтэй юм байна гэж бодогдсоныг нуух юун.

Гэхдээ таван хүний дунд хоёр малгайтай ирсэн бидний буруу бас бий. Хэхэ. Үнэндээ нэг нь ч камер хүртэл санаагүй нь бэлтгэлгүйг гэрчилнэ.

Таван минут орчим дээш өгсөхөд спикерээр янз бүрийн стилийн дуунууд холилдон явж байв. Уг нь маркет шэер хийгээд аль хугацаанд ямархуу хүмүүс ирснийг тогтоон, тохирсон хөгжмийг арай цанга явуулж байвал илүү кайфтай байхаар байлаа.

Эхний гулгалт=Нэг уналт. Би ч энэ замаас салаагүй ээ. Айгаад. Унасан шалтгаан нь яг миний урд нэг хүүхэн унаад, унахдаа таягаа надруу шидээд, бултахдаа уначихсан юм. Үнэн шүү. Хэхэ.

Ер нь замынхаа зэрэглэлүүдэд гулгах шаардлага тавих хэрэгтэй юм билээ. Анх очиж байгаа хүнийг заавал нэг багш дагалдаад шалгаад эрх өгдөг бол сайн гэж бодогдсон. Нэг сэтгэлийн хөөрөлтэй баагий экстрем зам дээр гулгаад унаж үхвэл яана.

Овоо гайгүй гулгадаг 2 найз маань дээшээ гарлаа. Нэг хэсэг алга болов. Бусдаасаа  онцгойрч snowboard авсан анд минь гулгалгүй хүлээв. Бас л байдаггүй.

Нэг ажилтанд нь мэдэгдлээ. Зүүн мөрөндөө зүүсэн богино долгионы станцаар дор нь илрүүллээ. Гайхалтай юм шүү. Шал дэмий санаа зовж. Зүгээр л зөрсөн ажээ.

Дээр байрлах насилк ил харагдах нь сэтгэл зүйд жоохон тийм боловч энэ мэтчилэн аюулгүй байдлыг зарим тал дээр сайн хангажээ.

Жаахан пиар маягийн зүйл хийвэл ажлын өдөр хүн багатай бөгөөд 4 цаг бол хангалттай сэтгэл ханамж авахаар хугацаа юм билээ. 7 гэж эхэлсэн бид 9 цагт залхаж эхлэв.

Кофе уухаар том танхимд орж ирлээ. Эндэхийн ажилтнууд нь харин гулгалтын талбайн харцуулаа бодвол арай гайгүй ааштай юм аа. Сандалнууд нь дан мод болохоор жоохон тухгүй. Ер нь даарч орсон хүмүүсийг дулаацуулах ямар нэгэн үнэгүй сэрвис энд цугласан зарим хүмүүсээс харагдаж байлаа.

Энэ бичлэгт та бүхнийг анх, эсвэл дахин очихдоо анхааруулах зүйлийг хүргэсэн тул хэн нэгнийг хэт магтаж муулсангүй, гагцхүү бодит байдал, бодсон бодлоо үнэнээр хүргэв.